Nyollo ea litifiso tsa motlakase e fanyehiloe

 98 total views,  2 views today

Ka Tumisang Serame

Nyollo ea litifiso tsa motlakase e kopiloeng ho Lekhotla la taolo ea Motlakase le Metsi (LEWA), e kopiloeng ke K’hamphani ea motlakase ea Lesotho (LEC) e fanyehiloe khoeli tse tharo ho fihla ka la 31 Phupu.

Mabaka a lekhotla lena a ho fanyeha qeto ea ho nyolla litjeo tsa tsebeliso ea motlakase ke seoa sa kokoana-hloko ea corona (COVID-19) e hlasetseng lefatše ka bophara ‘me e qobelletse mebuso ho emisa motsamao oa sechaba le tšebetso ea likhoebo.

Ka la 17 Pherekhong, LEC e ile ea isa kopo ho LEWA ea ho nyolleloa litefiso tsa motlakase ka linoko tse 32.6 lekholong (32.6%) mekhahlelong eohle ea tšebeliso ea motlakase ebile e ile ea bolela hore e hloka chelete e kaalo ka M1.21 ea libilione bakeng sa tšebetso selemong sa lichelete sa 2020/21.

Ho ea ka kopo ena, LEC e re e ikamahanya le “theko ea motlakase ho tsoa litsing tsa phehlo (haholo kantle ho naha), litšenyehelo tsa tšebetso tsa letsatsi ka leng, litšenyehelo tsa ho lokisa le ho baballa thepa ekasitana le litšenyehelo tsa ho reka thepa e ncha ele hontša e seng e tsofetseng,” ho rialo LEC.

Linyollelo tsena li ne li lokela ho tla kena tšebetsong ka la 01 Motšeanong 2020, empa li se li fanyehiloe.

“Boto e hlokometse boemo bo hlobaetsang bo tlisoang ke COVID-19 le litlamorao tse mpe tsa eona, haholoholo ho putlama ha moruo, ‘me ea ipapisa le lipolelo tsa Maano a Mmuso holim’a seoa sena,” ho supa LEWA.

LEWA e boetse e bontšitse hore ho thata ho etsa qeto ea ho kenya kopo eo ea keketseho ea litefiso tsa motlakase tšebetsong ho basebelisi nakong ena ea seoa se aparetseng lefatše.

“Ka mokhoa o tšoanang Boto e boetse e hlokometse hore LEC e tlameha ho lumelloa ho etsa mosebetsi ea eona ntle le tšetiso,” ho cho LEWA.

LEWA e boetse e re e fihletse qeto ea hore, “Litheko tsa litšebeletso tsa motlakase tsa selemo sa lichelete sa 2019/20 li tla tsoela pele ho kena tšebetsong ho tloha ka la 01 Motšeanong ho isa la 31 Phupu, 2020, qeto ea mapomelo e holima kopo ea LEC ea ho nyolla litheko tsa motlakase ea selemo sa lichelete sa 2020/21 e tle etsoa bonyane kamor’a likhoeli tse tharo le hore hape LEC e tšoanela hore e kene ka matla letšolong la ho etsa hore litsi tse e kolotang chelete e leng Makala a ‘Muso le likhoebo tse ikemetseng li ee lefe”.

Leave a comment